Rev 10 | MED | STEP | Ui ni pora nilinga kᵾn, na moⱡᵾp kundᵾr mel, anggelo ronduⱡ ti, muⱡ kona ei wak ropa mana urum. Elim nga kᵾng ei, kona kopa ndi, kum roⱡnga kᵾn, peng ila kona kᵾmp kᵾpᵾm ndi, mᵾkᵾp ropa pelinga kᵾn, kᵾmp keta ei, kona ant na ni mel rᵾⱡang puⱡnga, kump raⱡ ndip anmbil mel noⱡnga urum.

Revelation of John 10

Anggelo Ti Ndi, Jon Ni, Buk Kat Ngurum Ila Nurum

1 Ui ni pora nilinga kᵾn, na moⱡᵾp kundᵾr mel, anggelo ronduⱡ ti, muⱡ kona ei wak ropa mana urum. Elim nga kᵾng ei, kona kopa ndi, kum roⱡnga kᵾn, peng ila kona kᵾmp kᵾpᵾm ndi, mᵾkᵾp ropa pelinga kᵾn, kᵾmp keta ei, kona ant na ni mel rᵾⱡang puⱡnga, kump raⱡ ndip anmbil mel noⱡnga urum. 2 Elim nga ki ila buk kel kat ambuⱡpa, mepa urum kᵾⱡ, kumba tᵾpa titim. Wote, elim nga kᵾmp mbo orunga, num kuta ila kambilpa, kᵾmp rar orunga, mᵾi ila kᵾmbᵾtᵾm. 3 Wote, kui laiyon na, ke nᵾtᵾm uⱡ ni mel, etpa ronduⱡ wi rurum. Ni kᵾn, kopa 7 kat ndi, guⱡa gaⱡa nᵾk ik nᵾk, yant ndurᵾng. 4 Kopa 7 kᵾⱡ ik nᵾk pora nduⱡmina, mon rimp pilip it. Ei kᵾn, muⱡ ila wamp nga ik ti ndi, nimba mel, “Kopa 7 kᵾⱡ nga guⱡ gaⱡa nᵾk ik ninmin kᵾⱡ pilkᵾn, gi ndukᵾn molkᵾn kᵾn, mon rokᵾn, mana ndui nᵾndi!” nitim.

5 Unt anggelo ti, num kuta kᵾn, mᵾi raⱡ ila nga kᵾmp kambilpa murum ni nga ki mbo orunga muⱡ ila oⱡa ndupa kᵾn, ik kupa mendpᵾⱡ ti, Got rᵾk rᵾk kont morum ei nga mbi ila nitim. Got ei ndi, mᵾi ei, mim etpa kᵾn, mᵾi ila tetᵾm mel mbᵾ pora itim. Muⱡ ei etpa kᵾn, muⱡ ila tetᵾm mel mbᵾ pora itim. Num kuta etpa kᵾn, num ila tetᵾm mel mbᵾ pora itim. Anggelo ei ndi, nimba mel, “Ui mbᵾ pora nimba enim ila, Got ndi, nukundi nakᵾndᵾmba mon! 7 Wote, anggelo 7 ei pikul ik ndum ei kᵾn, Got nga ik nimba etmba pilpa itim uⱡ mo ropa tetᵾm mbᵾ, unt elim nga painui kongun wu mbᵾ ndi, nᵾtᵾng ei mel etpa pora ndumba,” nitim.

8 Unt muⱡ ila nga wamp ti nga ik nitim pit uⱡ ei mel, aldpa na kundpa, nimba mel, “Nim pukᵾn anggelo ti, num kuta kᵾn mᵾi raⱡ nga kᵾmp kambilpa morum ei nga ki ila buk kat kumba tᵾpa tetᵾm kᵾⱡ ti,” nitim.

9 Wote na ndi, mbo anggelo ni kundᵾp, nᵾmp mel, “Nim nga buk kᵾⱡ na, ngui nilmba na kundpa, nim ndi, buk kᵾⱡ tᵾkᵾn nana kᵾn, oⱡ ila nga rukᵾr orunga kombila etpa kᵾn, wote nim nga keta min ila pilma kopung mel, tᵾngᵾn etmba,” nit. 10 Nimba pora nduⱡnga kᵾn, wote na ndi, buk kel ni kᵾⱡ tᵾp nᵾr. Noⱡmba keta min ila, pilma kopung mel, tᵾngᵾn elinga kᵾn, wote nomp pora nduⱡmba, oⱡ rukᵾr orunga, kombila itim. 11 Wote, aldpa na kundᵾk, nᵾk mel, “Nim ndi, ik pai nokᵾn uⱡ, wote pemba mbᵾ mel, mᵾi kona mbila wamp na, wu nuim mumuk na, wamp ik elpa elpa nᵾk etmin mbᵾ, kundkᵾn ni!” nᵾtᵾng.